Eg fekk forleden ein idé om å bruke sosiale medium som presentasjonsverkty – både under forelesningar og temapresentasjonar i skulesamanheng. Eg ser for meg fleire måtar å gjere det på, og det kan vere ein måte å gje publikum større medverknad i forelesninga.
Her er sjølvsagt mange fallgruver – spesielt for ei yngre målgruppe er det stor sjanse for at slike løysingar er forstyrrande på mottakaren, og det er ikkje garantert at målgruppa er registrert på dei forskjellige sosiale nettverka som kan brukast. Men om ein er innanfor dei rette kretsane, og ein har planlagd opplegget så godt som naudsynt: ville det vere mogleg å bruke sosiale medium som presentasjonsverkty?
Implementasjonen er viktig. Det som gjer sosiale medium relevant i det heile er den sosiale biten. Om ein til dømes brukar Twitter, kan ein dedikere ein hashtag til det aktuelle temaet. Slik kan du svare på spørsmål som blir stilt gjennom Twitter, utan at publikum forstyrrar forelesninga. Du kan stille spørsmål og foreta undersøkingar direkte til publikum, utan at det merkast. Om du i tillegg har med deg ein partner som kan administrere dette parallelt, kan du få to presentasjonsmåtar samtidig, som gjer at folk som lærer på forskjellige måtar, får utbytte av det.
Ein kan også bruke plugins og spesiell programvare til å gjere presentasjonen meir saumlaus. Det finnast innstikk til både Keynote og Powerpoint som kvitrar presentasjonsnotata dine når du går til ein ny slide – med eigen hashtag som publikum kan følge. Då kan publikum svare på og omkvitre eit lysbilete, og så gjere presentasjonen meir dynamisk. I tillegg kan fleire få nytte av det du har å seie, og om temaet er interessant, kan debatten halde fram etter forelesninga. I tillegg er det ei ypperleg moglegheit til å leggje ved kjelder, fordjupingsstoff og langversjonar av det du har sagt.
I tillegg kan det vere interessant å inkludere det folk har sagt i din eigen presentasjon. Det finnast også verkty for til dømes henting av alle dei siste kvitter for ein hashtag inn i ein Powerpoint-presentasjon. Her finn du mange verkty som kanskje kan kome til sin rett i ein eller annan samanheng.
Ein treng ikkje eingong å benytte seg av konvensjonelle presentasjonsverkty. Eg veit at til dømes presentasjonsverktyet Prezi har brutt mange av konvensjonane for presentasjonar. Ein presentasjon treng ikkje å vere svart tekst på kvit bakgrunn (eller omvendt). Om ein har den nødvendige kompetansen, og klarer å utnytte den rett, kan ein lage ein presentasjon med alle slags digitale verkty. Eg som webdesigner ser uante moglegheiter ved bruk av til dømes sosiale medium som Twitter og Facebook – medan andre ser potensiale i film, Photoshop eller animasjonar.
Ein må imidlertid passe seg. Det er ikkje alltid like kult å setje inn Twitter i presentasjonen sin. Men opnar temaet for debatt, og du har eit stort nok publikum, kan det vere spennande å prøve seg fram med dynamiske og spennande løysingar. Det einaste eg eigentleg ber om er at du utfordrar deg sjølv, og gir opp clip-art, kvite bakgrunnar og Arial (eventuelt Comic Sans MS) som skrifttype.